یاشاسین قهرمان تبریز
| یاشـــاســـین قهــرمان تبـــریـــز! | |
|
بوتون دنیالرین دردین قانار داغ سئوال اتسن سکوت ایلر دانار داغ سهندین اوستو قار دی التی قاندی بو جوشقون درد دن بیر گون یانار داغ
|
 |
| داغیدیلمامیشدان قاباق ارک - تبریز |
یاشاسین قهرمان تبریز!
ایکی گون قالاندا بؤیوک چیلله‌دن
آغ گونش چیخاندا قارلی قو‌للله‌‌دن
قیزارتدی عئینالی اؤز یان-یؤوره‌سین
اونون شؤوقو آلدی ارکین دؤوره‌سین
اوجا بیر سس دوشدو ساعات زنگینه
قیزیل شفق چؤکدو شهرین رنگینه
تبریزین قلبینه ایشیق ساچیلدی
آغیر بیر یوخودان گؤزو آچیلدی
مینلر سماوار تک خلقین سینه‌سی
قئینه‌دی، قئینه‌دی داشدی کینه‌سی
دورولدو رنگلری توتغون اومیدلر
قول-قاناد آتدیلار یورغون ایگیدلر
هر کوچه‌دن بیر سئل آخدی مئیدانا
مئیدان دولدو سولار چیخدی ائیوانا
اوز گتیردی شهره داغلارین یئلی
قاریشدی تبریزه کندلرین تئلی
داشلار اله دوشدو مئیدان چاییندان
داش ووران، داش یئین چیخدی ساییندان
هرنه اله یاتیب ووروب ییخدیلار
دویونجا دوشمندن آجیق چیخدیلار
ییخیلمیش بوتلرین بوینو سیجیمده
توزلو- توپورجکلی چوخ پیس لیجیمده
میلت گئتدی نوزولچولار جنگینه
آلوو تپدی یوز اوتوزدؤرد بانکینا
پولا حسرت کاسیب ال- ایاق یالین
شق اسکیناسلارین آسدی تونقالین
میلت نه ایستردی؟ - آزاد یاشاماق
دؤولت نه ایستردی؟ - اونو تالاماق
دوروب آیاق اوسته دردین باغیریب
اؤز قارا گونونه شاهید چاغیریب
یارالی-یارالی چکیب بایراغین
آنجاق کی بیلدیریب دیری قالماغین
خیدمته باغلانیب اوجا هیمتین
باشلاییب قورتاریب ایشی چوخ چتین
هدفلری آیدین گوجلری ییغجام
بیر مرامدان آلمیش هامیسی ایلهام
نظملی –نقشه‌لی دوزگون اینقیلاب
تاریخده یازماییب بونو هئچ کیتاب
آی قوجامان تبریز اوزون آغ اولسون
دوشمنی یومشالتدین الین ساغ اولسون
ایرانا اؤرگتدین عوصیان ائتمگی
آزادلیق یولوندا آییق گئتمگی
اولوردو هئی سنه ییرتیجی قورتلار
بیلیردیم کی، بیرگون دؤزومون پاتلار
 |
| مقبره الشعرا |
هئی تاریخین چرخی چؤندو- دولاندی
دئییردین کی هاچان بو ایش اولاندی؟
ایگیرمی دوققوز گئچمیش بهمن آییندان
نیشان گئتمیش اوخون چیخدی یاییندان
بو ایش سنه چوخدا حؤرمت قازاندی
اوندان بری دوشمن حقینی قاندی
آسدیلار شوشقاسین یوغون بئلیندن
چیرکین یامانلاری دوشدو دیلیندن
ووردولار- ازدیلر یئللی بورنونو
وئرمه‌سین قاباغا زیغلی قارنینی
قویماسین حق سؤزو آیاق آلتینا
دئمه‌سین مین یالان بیر یوزآلتینا
حق دئییبدیر تبریز ناحق ائشیتمز
حق یولوندا کیمسه اونا یئتیشمز
خالیص بیر سؤزوم وار ایگیرمی دؤرد عیار
هامی دایاناندا تبریز باشلایار
تبریز یئنه باشدیر، بو سؤز دوغرودور
خلقی ستارخانین خلف اوغلودور
هر یئنی بهمنین ایگیرمی دوققوزو
آرتیق تانییاجاق دونیا تبریزی
قوی ایگیدلر بوگون چیخسین چاپاغا
آتیلسین آلمالار- گوللر قاباغا
بوی چالیب اویناسین بوگون قیز گلین
آرزوسو گؤیلونده قالسین دوشمنین
بزه‌سینلر ارکی بایرام آدینا
خوش گونونو تبریز سالسین یادینا
قوی دئسینلر بوگون صمد یئرین بوش
دئسینلر چای اوغلو اونون شعرین قوش
بیر گوزل ایش گؤرسون هرکیم باشارا
قیزیل گول گؤندرسین اولدوز یاشارا
ائل شاعیری اوختای بوگون یاد اولسون
ائلین شاد ایستردی ائل ده شاد اولسون
قوی بئله گون شهره چیخسین کارناوال
ماراقلی پنجه‌لر توتسون تار- قاوال
قوی بو گونو دئسین قوجا عاشیقلار
ائل ایچینده باشی اوجا عاشیقلار
ظفرلر قازانسین قوجامان تبریز
یاشاسین. یاشاسین قهرمان تبریز
